Langit Wis Kebak Panjerit lan Kumandhange Tangis
wong-wong ngenteni kabar becik
Promosi Tragedi Kartini dan Perjuangan Emansipasi Perempuan di Indonesia
sawise udan barat nggulung wengi dhedhet
lintange padha gogrog kasempyok thathit mobat-mabit
langite suwek kasamber bledheg ngekek
pet!
dimar mati
samyuh ambek radio lan televisi
--kang durung rampung ngabarake banjir bandhang
tanpa kenthong tanpa titir
atine sapa sing ora sangsaya mendhelong lan ketir-ketir
wong-wong ngenteni kabar becik
sing neka malah kanyatan agawe miris
memala sabrayat korate wis pacak baris
nyebar kacintrakan saka kutha-kutha
tumekan desa-ngadesa
sing ala sing becik gusis ditumpes tapis
kantor desa puskesmas nganti pegadhen
dikebaki wong mertamba
gumarenggeng suwarane
embuh nggruguh apa ngrapal donga
langit wis kebak panjerit
lan kumandhange tangis
Tritisan, Februari 2021
Kabar Beci king Esuk Kang Isih Suntrut
esuk-esuk dheweke wis mbrebes mili
ing kantor desa sawise meh semaput nunggu giliran
dhaptar ben diakoni negara olehe nglakoni urip
: kecingkrangan
enggal bali tekan omah kepapag anak lan bojo
banjur bareng tetangisan parisuka
”mbokne, ayo sesuk takterke nyang rumah sakit”
Poncotsenthong, Februari 2021
Embuh
embuh iki desa apa
kebawah kraton apa negara ngendi
kabeh kaya kumlebat mung jroning pangimpen
wong-wong lumaku rebut rikat
tegalan sawah kantor lan sadawaning delanggung
tekan kuburan wus dadi pasar maling
ya sing dodol ya sing tuku nyambinggendam
nyambi ngglembuk utawa ngenthit
embuh iki jaman apa
taun apa lan temu pira sengkalane
apuskrama pitenah lan kadurakan menangi kencana rukmine
yen ketemu rowang apadene sanak-kadang ing sadhengah papan
ngene iki pitakone:
sampeyan lara apa, kang!
embuh iki piye
ing kene wong-wong padha ngaku waras
kamangka senajan sing kuwarasane dibundheli layang kekancingan
yen ora mendem banyu bening ya kesurupan
Sendhangsamun, Februari 2021
Lurah Tiban
lamon entuk ditengeri bakal dakgaritake gurit sengit
salumahe watu gilang
saemper pawartamanawa duk ing uni ana
lurah tibaning desa kene
: panganane ndhas kali, kebo-sapi, lan lemah sangar
mati mendem sawuse nampa ganjaran saka njeng bupati
kadidene pelopor pembangunan karang padesan
rakyate?
padha kecingkrangan kedawan-dawan
sawise bola-bali kapusan
Desa Kene, Februari 2021
Wus Sagelar Sapapan
yen pasar dadi gambaran
wong dodol ketemu wong tuku
carane wong tetanen: nandur-ngundhuh
o!
saiba nggegirisi lamon teka kapan
mangsane ngundhuh kang tinandur embuh biyene
sapa ora miris nyawang
: sedulur kang kerumatan wus adhep-adhepan
lawan sedulur kang ora kerumatan
sagelar sapapan
ing pabaratan
o!
lamon bisa tinumbalan
apa kowe ora gemeter yen kewetu takon
: pira pitukone
--sedulur kang kerumatan wus adhep-adhepan
lawan sedulur kang ora kerumatan
Kaliwetan, Februari 2021
Bonari Nabonenar
Sutresna Sastra Jawa, dedunung ing Jl. Teuku Umar, RT 003/ RW 002, Desa Plumbangan, Kecamatan Doko, Kabupaten Blitar, Jawa Timur.