Simbah
simbah mung nduwe teken minangka congkog urip lan nyeker dhuwit sekethip ora ana dhuwit pensiyunan apa maneh sak jejeran tunjangan
Promosi Persib Bandung, Timnas Indonesia dan Percaya Proses
ing desa kene, omah sak kepel kena kanggo udhu piye supaya urip greget gentayangan lumaku tak sawang maneh omah iki krasa bisu kaya tugu kanggo giliran tilasan anak-putu; yen kabeh banjur keterak mawa semeru sing bablas blandhang kanca-kanca kelangan cekelan kudang putuku sing temangsang ana kutha sranta; urip krasa sepa
Semarang, 2021
Bocah
kretek jejeg Glodok Perak keterak pedhot, nyengklak, gawe atimu nangis kekel ing bathukmu tak waca kekarep dawa mbangun kreteg bakoh nanging kaya cepete Bandawasa gawe candhi saknalika dikompleti tali menthang njiret gulu wit-witan mrambat golek ilmu saka sumehe guru
nanging meja-kursi durung diguyangi mbaka siji kabeh nunggu kahanan tentrem karene sinau kebak rasa ayem
kretek isih dadi pepalang sedhela maneh bakal mengkurep. Ewonan sikil mlaku mbaka siji, semono uga rodha luwih rata tinimbang watu sak kebo-kebo mlongo
Semarang, 2021
Ibu
; rumini lan salamah bektine ora kecandhak, sanadyan mung nyampirke pundhak playune rikat, genine molat-molat; mlayua tetep tiba mung ibu sing bisa didhekep pasrah merga kanggo ngetung ambegan wis krasa semplah “Kowe ora melu Sedulur-Sedulurmu?” pitakone Ibu nunjem sawangan rapet kagegem Mripat landhep mung kari sambat mili netesi “Kula mboten saget ninggal Ibu, ingkang sampun mbobot Nyusoni, netah, ugi mlajeng kanthi kenceng,” semaurmu Kocapa ing njaba bayu geni nyuwara kemrosak banter Ora ana sing wani njajal minger
Semarang, 2021
Bapak
sakwise Subuhan mak klepat lunga gambarane ora cetha ninggalke aku lan bocah gunggung sejinah weteng perih tak grujug lenga putih kareben krasa ngelih malih
yen ngonangi sapi lan wedhus, bapak ora kelingan lali adus. Kelingan tumancepe petungan untung-rugi gulungan jaman bakal ngedhap-edhapi bapak bali ngetung polahe cempe-cempe bisa kanggo nyumet ragat sekolah putune wedhus lan sapi sing ndhelik ana mburi omah, rumangsane wis primpen nanging suket, godhong turi tekan bentelan dami kudu golek negara ngendi?
Semarang, 2021
Bojo
Bojoku mabur menyang ngendi? Jare pamit tilik omah nanging kok durung bali? Muga mung mbukaki lawang kamar, senthong, pawon, mbukaki gembolan ngisor kasur dipan yen kabeh kasil dislametake banjur bali rene
bojoku ana ngendi? ati mrinding, watuk-e semeru bakal mbludru nyuntak awu mongah-mongah
aku mung kepengin muluk sarapan Kang lawuh uyah ora apa-apa timbang njero weteng ana sing wadul : Kok telat ana apa?!
Semarang, 2021
Budi Wahyono, penggurit kelairan Wonogiri sing netep ana pinggiran kutha Semarang. Guritane kasebar ana sakwernane media. “Kelingan Gaplek”, kumpulan geguratane paling anyar (2021)