Wedi Lara
Ana aturan anyar Kabeh warga kudu nganggo masker Supaya memala ora nular Senajan yen keblekepen bisa klenger
Promosi Ayo Mudik, Saatnya Uang Mengalir sampai Jauh
Kaya mengkono yen wedi lara Nalika pageblug ndadra-ndadra Sing waras dianggep lara Apa maneh sing lara
Wedi lara Bakal muspra Yen akeh sing ora precaya Senajan pancen akeh sing lara
Pancen wis mbiyen mula Kabeh sing mati mesthi tau lara Embuh apa memalane Embuh pira umure
Nalika akeh sing precaya Marang sapa sing wedi lara Bakal padha kemenusan Banjur kelangan kamanungsan.
Griya Pena Kudus, 2021
Wedi Mati
Sapa sing wedi mati Bakal mati Sapa sing ora wedi mati Uga bakal mati
Ora prelu wedi mati Kabeh sing urip bakal mati Sing mati bakal urip maneh Wis ana papesthene kabeh
Pancen wis lumrahe manungsa Duweni rasa wedi mati Jalaran kakehan dosa Lan lali wetone rina wengi
Nalika wedi mati Kabeh liyan dadi memedi Senajan bebasane urip tanpa memala Jalaran ora ana doltinuku suwarga
Wedi mati Aja dianggep mokal Jalaran kabeh sing urip iki Kadya laler marani kadhal.
Griya Pena Kudus, 2021
Remeng-Remeng
Remeng-remenge kahanan Bakal gawe remenge pangaran Abang karo ijo katon ora seje Mrengut karo mesem padha ayune
Banjur akeh warung remeng-remeng Misuwure sapa mara bakal seneng Jalaran sing mlebu arep mangan Malah ditawani dipan
Remeng-remeng Pancen dudu padhang Nanging uga ora peteng Kabeh banjur dadi mamang
Remeng-remenge kasunyatan Bakal dumadi pasulayan Sing becik ora cetha Sing ala ora ketara
Pancen akeh sing seneng Marang papan remeng-remeng Jalaran ora kuwatir blereng Senajan wungu katon ireng.
Griya Pena Kudus, 2021
Aja Padha Gumun
Aja padha gumun marang wong-wong kuwi Saben blanja njaluk rega-rega dilarangi Nempur beras bae kudu menyang manca Jalaran kabeh sing mbayari negara
Aja padha gumun marang wong-wong kuwi Senajan pendhidhikane tekan es telu Nanging saben ngitung-itung mesthi kleru Lima ping rolas dadi satus apa malah sewu Beras sekilo ping sewu dadi limang ton
Aja padha gumun marang wong-wong kuwi Dipercaya ngedum beras marang kere-kere Malah mripate cadhok lan mbingungi Banjur isane mung eling sanak krabate Sing omahe sakiwatengene
Aja padha gumun Nyawang kanyatan Sing satemene tangeh lamun.
Griya Pena Kudus, 2021
Dodolan Banyu
Sansaya akeh sing dodolan banyu Kamangka banyu satemene ora dol tinuku Malah ana banyu dijapani klawan ayat suci Banjur regane dadi larang ngungkuli kopi
Dadi kelingan mangsa mbiyen Banyu kendhi dicawisake ing ngarep omah Sapa bae sing ngorong bisa ngombe Tanpa kula nuwun tanpa matur nuwun
Sansaya akeh sing dodolan banyu Tanpa pakewuh marang sing gawe banyu Kamanungsan banjur kadya sirna Ora ana maneh tetulung marang sapadha
Sansaya akeh sing dodolan banyu Banjur ngangsu dianggep saru Kendhi-kendhi kesingker pager ayu Sumur-sumur kebacut kelangan timba Kamangka banyu duweke kang kuwasa Ora pantes diwenehi rega.
Griya Pena Kudus, 2021
Aja Ladak
Pangarsa padha ladak Rakyat cilik dioyak-oyak Sing lali maskeran dadi budhak Kadya kompeni marang pribumi Nalika sadurunge kamardikane nagari Bener-bener nggegirisi
Aja ladak marang bangsane dhewe Ing mangsa pageblug iki Rakyat cilik sansaya kere Yen susah mesti gampang lali
Aja ladak nemen-nemen Kabeh kudune tetep dieman Sing lali pantes nampa sengen Murih kabeh tetep seger kuwarasan
Nalika memala gampang nimbal-nimbal Pancen urip dadi sarwa kedungsal-dungsal Mula aja ladak Aja ladak!
Griya Pena Kudus, 2021
Padaringan
Padaringan ing pojok pawon iki Wis kosong kawit sasi wingi Saben dina nempure ora sepira Sawise kapeksa ngiris pedhet jemaka
Saiki kandhang wedhus uga wis kosong Jalaran wedhus sapranak uga wis didol Aja nganti lemari dipan katut digotong Senajan kabeh katon sarwa kemedol
Yen pageblug durung dipungkasi Pabrik-pabrik ora bakal dibukak maneh Bansos saka pamarenthah bakal diwatesi Bocah-bocah bakal kepeksa ngombe teh
Saiki sansaya akeh kawula padha susah Sawise kebon sawah padha dadi omah Akeh ibu-ibu sansaya kangelan ramban Ora ana maneh bayem thukul ing plataran
Kanggone kabeh kawula cilik Yen padaringan kosong mripate mendhelik Embuh tekan sok kapan Bisa maneh ngisi padaringan.
Griya Pena Kudus, 2021
Kramas Merang
Mbah Uti rekmane dhawa Wernane ireng gilap banyu tawa Saben dina Jumuwah esuk dikramasi Nganggo cem-ceman awu merang sepanci
Biyung uga tansah kramas merang Rekmane dhawa limang kilanan Nanging wernane wis mublak sawang Jongkate sansaya kagubet brodolan
Kramas merang Wis diganti shampo rentengan Sing wangine kadya kembang Sing jare bisa nyegah thukule uwan.
Griya Pena Kudus, 2021
Golek Kroto
Golek kroto dadi pakaryan Jalaran sansaya akih wong ngingu manuk Sing regane sansaya edan-edanan Ana manuk sing ajine padha karo gumuk
Golek kroto wis lumrahe mlebu metu alas Menek wit gedhe dirubung ngangrang Bebasane rawe-rawe rantas Putung kabeh sing malang-malang
Golek kroto kanggo urip bebrayan Pancen sajak ora tinemu akal Nanging murih wareg kudu kangelan Senajan katon mokal
Golek kroto turun temurun Kadya ora ana pakaryan liya Ora usah gumun Aja dikuya-kuya.
Griya Pena Kudus, 2021
Tebu
Tebu ijo apa kuning apa abang Kabeh mesthi manise Bisa dadi gula kanggo wedang Gawe marem sing ngombe
Tebu ing Jawa padha karo tabu ing manca Tau dadi senjata kanggo njajah negara Mbiyen, ing saperangan kutha Kompeni mbangun pabrik gula Rakyat desa dipeksa nandur tebu Nanging gulane banjur diangkut prau
Saiki rakyat wegah nandur tebu Jalaran gula saka manca padha teka Regane medhe tansah dol tinuku Wekasane dadi memala
Tebu pancen manis Sing kuning apa ijo apa abang Kabeh namung lamis Banjur dadi wedang Wekasane dadi memala Sing bakal mretheli raga.
Griya Pena Kudus, 2021
Pari
Sapa nandur gabah Bakal thukul pari Sapa ngrumati pari Bakal panen gabah Mengkono unen-unene Senajan kasunyatane bisa seje
Kawit mbiyen mula Wong tani pancen rekasa Nandur pari kelangan sawah Sawise adol bekakas omah Jalaran tikus padha ngamuk Banjire uga peres gumuk
Pari apa gabah Mambu kringete wong mberah Regane kadya obahe dacin Jalaran impor beras kebacut ora isin.
Griya Pena Kudus, 2021
Prasmanan
Dumadining urip enak kepenak Yen saben arep mangan Bisa milih apa sing dipangan Nanging weteng dudu dunak
Mula ora kabeh kudu dipangan Murih ana sisa kanggo sapa Ngombe uga aja nganti kakehan Weteng uga dudu rawa
Elingana pituture wong tuwa Yen memala gawan kemaruk Urip aja nganti kabotan raga Bebasan wit bakale ambruk
Ing kahanan sarwa prasmanan Sapa kemaruk bakal kapiran Kepara marem malah cilaka Katerak memala lan bebaya
Panganan Apa umbenan Yen pancen ana sisa Aja nganti muspra.
Griya Pena Kudus, 2021
Maria M. Bhoernomo Pandhemen Sastra Jawa, dedunung ing Prambatan Kidul RT 002/ RW 004 No.755 Kudus 59331 Jawa Tengah