by Newswire - Espos.id Jagad-jawa - Minggu, 25 April 2021 - 23:46 WIB
ESPOS.ID - Ilustrasi mayat. (Freepik)
REBUTAN MAYIT
Wis pantes diarani edan-edanan Yen mayit bae dadi rebutan Kadya bandha warisan Upyek tekan pengadilan Banjur ana sing kejiret ukuman
Pancen gawe miris yen mayit dadi rebutan Satengahe pageblug sing nyalawadi Banjur akeh sing padha kemenusan Pasar-pasar dadi singup nggegirisi Akeh sing banjur numpuk utang Sawise nggrogoti papan sandhang
Rebutan mayit bakal kedaden maneh Yen isih ana sing ora bisa triman Utawa ora gelem seleh sumeleh Apa maneh mituhu paugeran
Sajroning urip bebrayan Kabeh kudune njunjung kinurmatan Sing mati diopeni kanthi bener lan pener Sing kuwasa aja ngangsi keblinger.
SEMUGIH
Akeh sing padha semugih Tanpa ngukur ambegane Nganti menggeh-menggeh Banjur kapiran pungkasane
Ora preduli panas apa udan Latar omah dadi panggung ndhangdhutan Sesuke jebul diuber-uber tagihan Kamangka omahe wis dadi agunan
Urip sing becik kuwi apa jare Yen pancen kere aja munggah bale Apa maneh turu ing tumpukan kasur Dadine bolak-balik malah nglindhur
Pancen akeh sing seneng semugih Pamer omah pamer tedhak getih Banjur bolak-balik kewirangan Rana rene kesangkut kadurjanan
Pancen akeh sing ngaku juragan Banjur nglempuruk kurugan utang Omahe magrong-magrong ngadhepi ratan Jebul suwung ditinggal nginep ing pakunjaran.
Kandhang Rodha, 2020
PASIEN STROKE
Wong wadon kuwi durung tuwa Menawa umure lagi telu lima Nanging rina wengi turu mlumah Ngablah-ablah tanpa obah
Wong wadon kuwi pancen lara stroke Sawise kelangan kaluwargane Anak bojone minggat Omahe wis didol kanggo brobat
Sadurunge lara stroke Dheweke dodolan awake Jalaran ora marem duwe bojo Sing dikuya-kuya jare wis loyo
Menawa pancen wis kuwalat Tiba banjur ora bisa ngglawat Sawise saka hotel ditabrak jaran Ngathang-ngathang ing ratan
Saben ana tangga sing niliki Wong wadon kuwi mbrebes mili Arep ngomong ora metu suwarane Jalaran ora bisa ngobahke lambe.
Kandhang Rodha, 2020
NGANGGO MASKER
Jare dhokter-dhokter Kabeh kudune nganggo masker Supaya ora klenger Dirubung virus sing muser-muser
Saiki akeh sing padha gawe masker Uga sansaya akeh sing lenger-lenger Banjur sansaya akeh sing kadya kleleb Rina apa wengi bisane mung sedhakep
Nganggo masker Yen kesuwen bakal klenger?
BANJIR LAN PROYEK
Yen kali-kali sing banjir Ora bakal dadi pawarta Nanging yen ratan sing banjir Ora mung dadi pawarta Nanging uga dadi proyek
Kaya mengkono kasunyatane Persasat kebacut dadi tradhisi Saben bar wayah udan akeh pawarta Banjur akeh proyek
Banjir lan proyek Lir kadiya mimi lan mintuna Wong cilik mewek-mewek Wong gedhe pamer rodha.
Kandang Roda, 2021
BEBAYA
Bebaya tansaya nggegirisi Jalaran manungsa padha lali Marang papestene Gusti Ngoyak-oyak wektu Malah pati kang tinemu
Aja maneh wong-wong cilik Jenderal-jenderal wae bisa kecelik Nalika arep ngasorake wektu Kesusu-susu banjur kesandhung watu
Coba sawangana Ratan tansaya amba Nanging tansaya mbebayani Jalaran akeh sing lali Marang paugeran Marang keslametan
Coba sawangana maneh Omah tansaya akeh Sadawane tanggul kali Banjur padha keli.
Kandang Roda, 2021
LONGSOR
Tansaya akeh pawarta Gunung-gunung padha longsor Banjur ngurugi manungsa Sing kebacut lali andhap asor
Sejatine ora prayoga omah-omah Sadhuwure lemah kang miring Kejaba pancen wis pasrah Kapan wae bakal kabanting.
Kandang Roda, 2021
Siti Siamah Pandhemen Sastra Jawa, lair ing Grobogan 26 Desember 1977. Nyerat geguritan, cerkak, esai. Uga nyerat prosa, puisi lan opini mawi basa Indonesia.