Bang Esuk
Esuk-esuk uthuk-uthuk Jagone kluruk Srengengene nyunar Bang bang wes rahina
Promosi Mendamba Ketenangan, Lansia di Indonesia Justru Paling Rentan Tak Bahagia
Para kadang tani Padha menyang sawah Laku guru swarane Ngebaki dalan
Para warga kampung Ngusungi tetanen Para damen damen jare kandhane kanggo Aran wong cilik
Wes ambyur ing palagan Sawah Swara srak srek Tangga tangga olehe nyapu latar Bakule blanjanan wes mapak
Gawa sak warunge ana ing bronjong Kembang lan tetanduran Mesem guyu ora ana kang ganggu Ocehan manuk, kupu mencok ora ana sing ngruda Kabeh manggon papan dhewe
Banyu Panguripan
Ngetuk Tuk ing uni saka njero bumi
Kadal, tekek, bencok, luwing, pacet, lintah, cacing, kinjeng, uler Isih turu mlungker Saba nora ganggu gawe
Sik ganggu gawe baliya marang asal-muasalmu Ana ing kampung urip rukun Ora padha seneng congkrah
Dadi banyu baliya banyu Geni dadiya geni Urip urup Yen mangerti endi geni endi mawa Mula balekna banyu panguripan Ben ora kadasat Kasat
Gurit Ampak Tumurun
Mbah Konyil Lambene komat kamit dremimil Maca mantra jupa japu Donga sapu jagad Enggal sumingkir
Bebaya aja lena aja kena goda Tetep eling waspada Kir sumingkir kir sumingkir Pagebluk pedhut
Ampak-ampak Ambar ketawang Dadi banyu baliya banyu Menyang segara Mancaka gunung dadiya gunung Dadi geni baliya geni Baliya menyang asalmu Kir sumingkir Baya lena
Pagebluk dhuhkitha samsara Enggal tamakna Donga sapu jagad Ing bumi baliya menyang asalmu Mbah Konyil dremimil Komat kamit maca Japa mantra Uwalana saka bebaya Anak putu sedaya Kalis nir sambikala
Dina Setu
Sore iki awak kaya dhitaleni dhipan Isih seneng rebahan Nonton njaba langit mendhung limengan Nanging awak ora bisa diajak menyat Mangkat Rasane aras-arasen
Apa marga iki dina Setu Awak abot kaya dibandhuli watu Kamangka sore iki aku kudu metu Nanging kok ya angel temen Dijak gumregah Menyat Nyetater Pit montor
Balapan karo udan sing wes gumandhul ana Ing ndhuwur wuwungan omah Nanging aku kudu mangkat Wit-witan Ngawe-awe Mbok enggal Selak udan Aku njranthal Lha terus apa sesambungane Karo dina Setu
Dina Setu Sore iki awak kaya dhitaleni dhipan Isih seneng rebahan Nonton njaba langit mendhung limengan Nanging awak ora bisa diajak menyat Mangkat
Adat Widi Widana
Dauping pinanganten kekalih Kadya jambe sinigar Ngrasuk hangraga sukma Gebyur ing madyaning bebanten kekalih Sarimbitan pinanganten
Pinanganten putri gandes luwes mlakune kadya macan luwe Cumlorote kadya wulan ndadari Pasuryane sumlorong kadya nyi blorong
Jalunipun kadya gusti kusuma Sesembahan sunan hamengkubuwana hanyakrakusuma
Saindengan widodari atur tedak siti Marcapada atur sembah sungkem dumateng kadya ratu lan raja
Ingkang nganthi patah sakembaran lan putri domas kang edi peni Sulistiya ing warni Kairing tembang gending kebo giro kirap pinanganten Sedaya paring dedonga lan pepuja dumateng gusti Mugi mrih salamiya Nir ing sambikala
Pawiwahan Ageng Mahargyan
Janur janur melengkung Kembar mayang sakembaran Wis siapke ing balai agung Gendhing Ibu Pertiwi kumelun Dhauping penganten kekalih dipun atur juru paes
Temu pinanganten Jejeran gedhang raja rung tundun Ana ing jejeran bale agung Kendhi lan alu katutup lurik Adat mecah endog lan Sesuci kang raka
Dhuh ibu bapa Ngger Upacara sungkeman Rama lan Ibu Penganten lungguh ndhodhok nyuwun pangestu mara rama ibu Dedonganipun tiyang sepuh mangestuni lampahing pinanganten kekalih Dados suluh salira
Penganten kekalih Nandur gedhang Nuwuhake wiji bebarayan ageng
Upacara Bubak Kawah
Juru bubak nyiapake uba rampe Adat bubak kawah Kangge wong mantu sepisan kudu ana acara adat bubak kawah
Wiji kawak isih kawak pengantin Wiji uwi gembili Beras kuning
Juru bubak Titah Gusti ngayahi wajib mantu sepindah Nalika Taksih jaka kumala kumpul prawan sunti Angganda lan rasa
Pinaringan wiji sejati Wiji wijining manungsa saking suwarga Maturunaken dateng mayapada jangkep sesasi maya maya Banyu patang prakara Patang sasi limang sasi si jabang gono nedi kupat lepet rujak bentis cengkir gading pelem tali jiwa idam idaman gesang manungsa
Gadhung gulur Ngancik nem sasi sampun wujud manungsa Asulur asma agadang rikma Lung lung gadung rambatan gunung Gadhung walur wong liya dadi sedulur
Lajeng pitung sasi tingkepi Padusane sednadng pancuran Ancik ancike watu gilang
Wolung sasi ngungak telenging samudera Ada bokor kencana ana kendaga kencana Isinipun raga sejati lan suksma sejati Sangang sasi jabang bayi pingin padhang hawa
Bukak Kuali
Sak kawak-kawake kuali tutup Isih kawak sri pengantin sekalian Sekar kuncup sak menika megar Bubakan kawah
Bikak tetanen boten enten kalising samubarang Isen-isen Niat ingsun bukak Kuali tutup Lumbung gadhung Kabukak
Gabah kawak Sak kawak-kawake taksih kawak pengantin
Taksih anak pengantin sekalian Tela lan kenthang Sak kawak-kawake kenthang taksih kawak pengantine
Uwi gembili Taksih kawak pengantin sekalian Jagung kawak Bili kawak gadhung waluh kawak Kebak mencep kaworan donga slamet Tetedhan opak criping jadah jenang tape Sak kawake tetedhan taksih kawak pengantin sekalian
Bukakan kawak Donga slamet
Sun muji muji Donga tolak balak
Kabar Duhkita : Didied
Ana layon kelayung layung Swarane wong sing lagi nandang sungkawa
Baline ora kandha kandha Agawe nrataping nala
Banyu mili netes eluh Dhuhkita Praptaning layon marang pangkuanipun Gusti Mugiya dipun jembaraken kuburanipun
Gusti Sinten malih ingkang marak sowan Sak kumleyangipun godhong asem
Sampun dados dalan pepesthinipun Mugiya pun apura sedaya salah lan dosa
Sak dereng jenasah pun leremaken ing astana pralaya Sanak sederek Bukak pethi kang pungkasan
Sung tindak sare ing dalem agung Ing parengkuhanipun Gusti
Sus S. Hardjono lair 5 Nopember l969 ing Sragen. Nulis puisi, cerpen lan geguritan, uga novel, wiwit isih dadi mahasiswa. Maneka warna karyane kapacak ing saperangan media ing tlatah Yogyakarta lan Jawa Tengah. Aktif ing Aliansi Peduli Perempuan Sukowati (APPS), Yayasan Indonesia Sejahtera (YIS) Solo, Yayasan Darmakumara Solo (Yayasan Pengembangan dan Pelestarian Kebudayaan Jawa), ing KPPS, Mansaceria, Teater Gatra, lsp. Tahun 2017 nampa pahargyan Guru Peduli Sastra saka Balai Bahasa Jawa Tengah.