Ana 10 jaran kepang kang duwe jangkahan sikil gedhe lan dawa. Para pambeksa Jaran Kepang iki lanang kabeh, tur awake keker lan gedhe-dhuwur. Tari kang diarani Tari Boyong Menoreh iki nggambarake para prajurite Raden Jayanagara ing perang Diponegoro kang kuwat lan prakosa. Tari ini nyritakake nalika ibukutha Kadipaten Menoreh/Parakan bubrah nalika perang. Mula Bupati Raden Tumenggung Arya Jayanagara mboyong kadipaten saka Parakan ing Temanggung. Tarian iki uga dadi tanda lair Kadipaten Temanggung.
Promosi Tragedi Kartini dan Perjuangan Emansipasi Perempuan di Indonesia
“Kekancingan pindhah kadipaten kuwi supaya masarakat bisa rukun, slamet lan raharja,” ujare Pangarsa Paguyuban Seni Kuda Lumping Turonggo Behkso, Juwahir nalika ditemoni Esposin, Senin (29/5) wengi ing Taman Budaya Surakarta (TBS).
Swara gamelan kang gumrincing ing pandhapa nambahi gayeng swasana Pesta Seni Rakyat Jawa Tengah kang dipasartani saka pepanthan sak-Jawa Tengah iku.
Tari Boyong Menoreh iku, jarene, wus dadi salah sijine seni tradhisine masarakat Temanggung, mligine warga ing Gunung Sindoro lan Sumbing. Jaran kepang kang gagah prakosa lan para pambeksane uga gedhe-dhuwur pancen dadi pilihan. Kuwi uga duwe makna yaiku prajurit kang kuwat lan ora duwe rasa wongrih, sanadyan mungsuhe luwih akeh cacahe lan senjatane uga luwih pepak nanging semangat kang gedhe bakal bisa nelukake mungsuh kang kepingin njajah bumi Nuswantara.
Miturut salah sijine anggota pepanthan, Misran, 41, adicara budaya ing masarakat Temanggung ora tau luput saka beksan iki. Adicara sunatan, manten, merti desa, lan panen mbako, wis mesthi rame lan masarakat padha kumpul rame-rame ing lapangan. Tuwa-mudha, lanang-wadon, bocah utawa wong tuwa kabeh melu seneng-seneng. “Ing Temanggung saben-saben dhusun ana pepanthan jaran kepang. Mula, saben panen embako, saben desa mesthi nggelar adicara jaran kepang,” ujare Misran.
Kejaba kuwi, antarane pepanthan siji lan sijine uga ada budaya undangan. Yaiku padha ngirim undangan nalika salah sijine pepanthan dhuwe ing gawe. “Budaya iki wus ana turun temurun, kuwi tandane masarakat seneng karo kahanan kang guyub rukun, ora padudon. Kaya dene tarian Boyong Menoreh iki uga nuduhake semangat lan guyub rukun,” ujare Misran. Ora mung nari ing Temanggung, Turonggo Bhekso uga ora kapetung maneh pentas ing kutha-kutha sakliyane Temanggung.
Juwahir nuduhake, nalika taun 80-an kesenian jaran kepang arang dibabar amarga wus ora ana semangat nguri-uri budaya. Nanging wiwit taun 90-an wis padha thukul kaya jamur merang ing mangsa rendheng, saben desa ana paguyuban utawa pepanthan jaran kepang. “Aku lan para pemaine wis gumantung karo kasil pertanian tembako. Mula, salah sijine ucap sukur yaiku nguri-uri jaran kepang. Budaya iki warisan saka leluhur, para generasi mudha kudu bisa njaga,” ujare.
Kajaba Boyong Menoreh, gelaran seni rakyat kuwi uga mbabar Tari Kretek mligine beksan saka Kudus. Cacahe pambeksane ana 19 wong, yaiku 18 pambeksa putri lan 11 pambeksa putra. Beksan iki mau ngandhut piwulang yaiku beksan masarakat Kudus kang wus kondhang minangka Kutha Kretek, kutha kang gawe rokok kretek ing jagad nasional lan internasional. Wujud beksane iki nggambarake tatacara gawe rokok kretek, yaiku saka ubarampe, mbako, cengkeh, diudhak lan dicampur dadi siji, dilinting, mbasil (ngrapekake rokok), banjur diwungkus.