Ing jaman modheren iki, kasenian kethoprak sansaya mbleret kuncarane. Apa maneh, industri panglipur sansaya ngrembaka. Wusanane, kasenian kethoprak dadi kadhesek, kepara ditinggal pamirsane. Akeh wong kang milih nonton TV tinimbang nyelakke wektu kanggo nonton kethoprak ing gedhung.
Promosi Tragedi Kartini dan Perjuangan Emansipasi Perempuan di Indonesia
Sanajan rega tikete murah, rata-rata antarane Rp5.000 saklembar, nanging ya kasunyatane tetep arang banget bendhelan karcis sing disedhiyakake iku bisa entek gusis.
Nanging tumrap seniman kethoprak, akeh-sithike pamirsane ora pati digatekake. Sebab, anggone ambyur ing jagad kasenian ditekadi kanthi temenan, ora kanggo golek dhuwit. Minangka seniman sejati, angger pamirsa utawa wong liya gelem aweh kawigaten lan ngajeni karyane seniman, iku wus cukup. Nanging seniman ya butuh urip, butuh mangan. Iku bab kang lumrah.
“Pancen nasibe seniman kethoprak ya kaya ngene iki. Nanging aku bombong karo kanca-kanca seniman. Sanajan pamirsane ora pati akeh, nanging ora padha dadi nglokro anggone mbabar karya. Kabeh tetep semangat, nglipur pamirsa setyane,” ujare Tatak Prihantoro, Pangarsa Kethoprak Ngampung, durung suwe iki.
Miturut Tatak, para seniman kethoprak uga ora kentekan cara kanggo nepungake lan nyedhakake kasenian kethoprak marang pamirsane. Pamane ora bisa teka menyang gedhung, senimane kang bakal nekani pamirsane. Bab iku bisa dituduhake kanthi nggelar kasenian kethoprak Ngampung ing kampung-kampung.
“Lakon kang diangkat biyasane uga ditrepake karo kahanan ing kampung iku. Kerep-kerepe uga nggandheng warga kampung iku. Warga kang mirsani kethoprak NGampung uga bisa melu moyoki, melu celathu, dadine pagelaran kethoprak Ngampung kaya ora ana wates blas antarane parag lan pamirsane,” piterange.
Dune cara liya kanggo nguri-uri kasenian kethoprak ing ngrembakane jaman, uga bisa ditempuh kanthi cara nggelar adicara mirunggan. Upamane Festival Ketoprak Solo (FKS), kang bakal digelar Jemuwah-Senen (17-20/2) ing Gedhung Kasenian Balekambang.
Koordinator FKS III, Gigok Anurogo, nyebutake FKS III dieloni 11 kethoprak kampung sak-Soloraya. Ateges gunggunge pasarta jroning adicara iki sansaya akeh. Taun-taun wingi amung dieloni pasarta saka Kutha Solo, dene taun iki wus ketambahan saka dhaerah sakiwa-tengene Kutha Solo.
Disebutake, para pasarta FKS iki yaiku Kethoprak Humor Kecamatan Serengan, Kethoprak Kembang Sore Kecamatan Laweyan, Kethoprak Sang Rama Budaya Kecamatan Banjarsari, Kethoprak Sana Puspa Budaya Kecamatan Pasar Kliwon dan juara FKS II, Gendheng Rex Kecamatan Jebres, Kethoprak Palguna Budaya Klaten, Serambi Sukawati Sragen, Wagu Budaya Karanganyar, Ketholeng Boyolali, Mitra Budaya Sekar Jagat Sukoharjo lan Mustika Budaya Wonogiri.
JIBI/SOLOPOS/ Damar Sri Prakoso