Ngungak Calon Arang kanthi Pamikiran Liya
Promosi Persib Bandung, Timnas Indonesia dan Percaya Proses
Nganti saiki, saperangan gedhe wong isih nganggep Calon Arang iku sawijining tokoh kang kejem lan culika, jalaran wus gawe pageblug lan nenung warga kanthi maneka warna jinis lelara kang nganeh-anehi.
Nanging tumrap sawetara seniman kethoprak lan juruwarta Kutha Solo, Calon Arang coba digambarke kanthi cara liya. Kepara lelakone Calon Arang iku coba didhudhah maneh. Aja-aja, panemune warga bebrayan ngenani Calon Arang iku luput. Aja-aja Calon Arang iku amung dadi kurban pawarta kang durung cetha dhodhok selehe lan bener-lupute.
Liwat pagelaran kethoprak kanthi lakon Randha Ratu Girah, Persatuan Wartawan Indonesia (PWI) Solo kang ngrayakake ambal warsane kang kaping-66, coba nuduhake iku kabeh. Sokur gage bisa mbukak rasa lan pamikiran anyare wong akeh. Pagelaran kethoprak iku dibabar ing Auditorium RRI Solo, Selasa (28/2) wengi.
“Ana sawetara piwulang kang coba ditularke jroning pagelaran iki. Salah sijine yaiku aja dhemen nuduh liyan utawa mikir ala marang wong liya. Sebab, lingkungan iku uga ana pangaruhe. Wong sing maune becik, manawa goreh atine bisa malih dadi ala,” pratelane sutradara, Ali Marsudi, marang Espos.
Lakon iki uga minangka piwulang luhur, manawa saben ana warta aja langsung dipracaya. Kabeh kudu dionceki dhisik lan digoleki bener-lupute. Diajab kabeh wong gelem golek pawarta sing luwih akeh supaya ora kepangan warta sing durung cetha bener-lupute. Bab iki, miturut Ali, satemene ana sesambungane karo gaweyane juruwarta.
Jroning pagelaran iki, Ali Marsudi uga melu macak lan maragani Empu Bahula. Dene sawetara juruwarta saka Kutha Solo uga kedhapuk dadi paragane, yaiku Pangarsa PWI Solo Subakti A Sidik (Suara Merdeka) minangka Tumenggung Pawarta Nagara, Suwarmin (SOLOPOS) minangka Tumenggung Kridha Taruna, Wiwid Widaningsih (RRI) maragani Magersari Girah lan Sri Wahjoedi (Suara Merdeka) maragani dhagelan.
Lakon Randha Ratu Girah dhewe nyritakake randha Nyai Calon Arang kang mimpin Padhepokan Girah ing Nagara Kahuripan. Calon Arang dianggep wong kang gaweyane nyebar mala lan pepati ing dhaerah kasebut. Warta iku banjur sumebar ing masarakat lan ndadekake gara-gara.
Nalika ana gara-gara, Calon Arang didadekake kambing hitam dening panguwasa Kahuripan, lan dianggep wong kang kudu nyangga tanggung jawab. “Konsep pagelaran iki rada beda karo adate. Calon Arang sing padatan digambarke minangka wong sing culika, nanging ing kalodhangan iki Calon Arang dadi wong becik. Mula masarakat padha nggeguru marang dheweke,” ujare Suparti, paraga Calon Arang.
Ing papan liya, Suwarmin nandhesake pagelaran kethoprak iki saliyane kanggo ngleluri seni tradhisi uga kanggo nggambarake kahanan nagara ing jaman saiki. “Nalika panguwasa kepengin tetep mengku kuwasa, tuwuh rasa kuwatir marang kakuwatan liya sing uga duweni daya kanggo mengku kuwasa. Brontake Calon Arang iki bisa uga kanggo nggambarake rasa bingunge masarakat kang ora nemoni sosok pamimpin sing dianggep cocog lan mumpuni,” ujare Suwarmin, kang uga Wapemred SOLOPOS.
JIBI/SOLOPOS/Damar Sri Prakoso, Memet Sudaryanto