Salah sijine pambeksa lan penata tari Mugiyono Kasido pancen wis mider jagad. Ora kapetung maneh anggone tampil ing ngarep para warga ing tlatah Asia, Eropa utawa Amerika. Nanging Mugi uga tetep ngupayakake dadi wong sing ora umuk.
Promosi Meniti Jalan Terakhir menuju Paris
Piyambake urip sakulawarga ing omah kang prasaja ing Desa Pucangan, Kartasura, Sukoharjo. Piranti omahe akeh sing digawe saka kayu. Meja-kursi tamu uga digawe saka oyot-oyotan wit sing wis dialusake lan diplitur. Sisih kiwa lan tengene durung ana omah, isih dadi kebon suket. Kahanan alam sing ayem tentrem kono ngono kuwi tumrap Mugi bisa nuwuhake gagasan.
Ing papan kuwi uga dadi sanggar sing saiki jenenge Mugidance. Sanggar kuwi, miturut Mugi, dadi papan pasinaone masarakat sing kepengin gladhen tari. “Mugidance iki kanggo nerusake budaya seni tari supaya masarakat tetep seneng lan bisa nari,” ujare Mugi durung suwe iki. Piyambake uga mulang tari marang para murid SD ing Solo.
Sanajan dadi seniman lan ngajarake seni, Mugi ora banjur meksa anak-anake supaya nyenengi seni kaya piyambake. Anak-anake diwenehi kebebasan kanggo ngrembakakake kekaremane dhewe-dhewe. “Aku ora meksa-meksa. Seni kuwi ora bisa dipeksa, nanging saka ati,” ujare Mugi.
Nanging anak-anake ya wis ditepungake marang seni. Wiwit isih cilik, anak-anak wis dijak mubeng melu nonton pentas. “Wiwit isih TK wis dijak nonton bapake pentas,” ujare Nuri Aryati, garwane Mugi.
“Dheweke terus kepengin melu pentas, terus diajari bapake, banjur melu pentas karo bapake,” kandhane Nuri.
Mugi uga seneng yen anak-anakne ana sing nerusake dadi penari. Siji sing kudu dieling-eling, kunci seniman supaya tetep eksis yaiku ora mandeg olehe agawe karya, uga ora gampang marem.