Dadi seniman ora mung ngurusi babagan seni thok, ananging uga preduli buwengan. Lawu Warta seniman Solo seneng gawe wayang sing digawe saka sampah, dluwang, godhong lan liya-liyane. Priya kang uga kerep disapa Rama Lawu iki wis gawe wayang saka uwuh wiwit taun 2005. Rama Lawu rumangsa prihatin marang kahanan sing saya suwe saya bubrah.
Promosi Liga 1 2023/2024 Dekati Akhir, Krisis Striker Lokal Sampai Kapan?
“Iki jenenge wayang eling, ateges wayange lingkungan. Aku duwe pangarep-arep bisa ngelingake masarakat babagan lingkungan,” ujare Rama Lawu ing Balai Sudjatmoko, Kemis (12/4) wengi.
Rama Lawu gawe wayang wujud manungsa lan kewan. Manungsa digambarake minangka titah sing duwe nalar lan budi sing sampurna, nanging malah gawe bubrah buwengan, mula sejatine luwih ala tinimbang kewan sing ora duwe nalar, ananging ora gawe bubrah.
Dheweke meling manungsa sejatine butuh buwengan lan sakisine kanggo urip. Bener wae, manungsa ora bisa urip yen ora ana banyu. Banyu ora bisa wening yen ora ana wit-witan. Sedhih lan susah nonton wit-witan sing akeh ditegori kanggo industri dluwang, mebel lan liya-liyane, banjur ora diwiwiti reboisasi.
Ngenes lan gawe getering ati kelingan anak-putu manawa ora bisa ngrasakake banyu wening utawa hawa resik. Kanyatan sing ora bisa dibantah, manungsa ora bisa urip ijen, nanging bebarengan karo titah liyane, kaya kewan utawa tetuwuhan. “Manungsa kuwi butuh, mula kudu diwajibake njaga lingkungan supaya bisa urip bebarengan kanthi laras,” piterange.
Ing kalodhangan iku, piyambake ngedum crita carane gawe wayang eling sing digawe saka dluwang. Urut-urutane yaiku dluwang disiram banyu banjur dadi jenang dluwang. Jladren kuwi dicampuri bahan-bahan liyane banjur dibentuk wayang terus dipepe. “Bisa digawe saka godhong lan jinis uwuh liyane,” critane seniman kelairan Solo 60 taun kepungkur. Saiki, Rama Lawu uwis duwe welasan wayang eling sing dinggo ndalang ing Nuswantara.