Rebo (4/7) wengi, ing tanggul kasebut digelar Upacara Keprihatinan kanggo miwiti Festival Monolog Kenthoet Roedjito dening Komunitas Tanggul Budaya.
Promosi Mendamba Ketenangan, Lansia di Indonesia Justru Paling Rentan Tak Bahagia
Ing upacara kasebut, budayawan saka Ngayogjakarta, Butet Kertaradjasa maragani pembina upacara, Slamet Gundono dadi inspektur upacara, uga ana Didi Nini Thowok, Suprapto, Tony Broer lan Anastasia kang maragani para pambeksa keprihatinan. Para seniman tari kasebut nuduhake tarian keprihatinan bangsa lan menehi seni tari kang apik kang bisa ditonton masarakat.
Ing tengah lapangan kasebut ana wit pring kang ngadeg lan dadi cagake gendera, nanging ora diwenehi tali kanggo ngerek gendera. Mula, seniman saka Teater Ruang Solo, Helmy Prasetyo, menek pring iku saprelu masang gendera abang-putih. Ing ngisore ana atusan wong wadon saka Sedulur Sikep, Pati, kang uga melu masartani upacara.
“Keprihatinan iki ora mung dikandhakake, nanging uga diwujudake,” ujare Butet ing upacara kasebut.
Perjuwangan Helmy naleni gendera ing pucukan cagak kasebut dadi tandha negara Indonesia ngadeg ora kanthi gampang, nanging butuh pangurbanan. Kajaba kuwi, jroning upacara kasebut, kabeh pasarta uga padha nyebutake isine Pancasila kanthi bebarengan.
Miturut pangarsa panitia, Sri Mulyo Spirit, upacara kasebut pancen ora kaya adate, amarga para seniman kepingin nuduhake ekspresi kanggo nggambarake kahanan ekonomi utawa pulitik ing Indonesia. “Kuwi ndeleng kahanan Indonesia kang bubrah, mula para budayawan kanthi sanjata budaya iki ngelingkake para panguwasa marang kahanan kang wus rusak,” kandhane Sri Mulyo Spirit.
Salah sijine panitia, Ratna Hadi, uga nyebutake festival monolog kasebut dadi wahana tumrap para seniman monolog senior kayata Butet, Tony Broer, bisa nularake ilmune marang generasi mudha. “Supaya ora pedhot anggone nunggak semi seniman monolog lan bisa dadi kanggo wadhah ekspresi para pasarta,” ujare Ratna.