Miturut Serat Layang Bauwarna yasanipun Ki Padmasusastra saha Serat Pranatamangsa anggitanipun Mas Budiharja, mangsa Mareng dhawah antawisipun wulan Kasapuluh (Maret-April), Dhestha (April-Mei), saha Sadha (Mei-Juni). Pratandhanipun awis jawah utawi sansaya suda jawahipun. Mangsa Katiga, dhawah antawisipun wulan Kasa (Juni-Juli), Karo (Juli-Agustus), saha Katelu (Agustus-September). Pratandhanipun mangsa benter, wit-witan kathah ingkang sami ambrindhil amargi boten nate jawah.
Promosi Mendamba Ketenangan, Lansia di Indonesia Justru Paling Rentan Tak Bahagia
Mangsa Labuh, dhawah antawisipun wulan Kapat (September-Oktober), Kalima (Oktober-Nopember) saha Kanem (Nopember-Dhesember). Pratandhanipun wiwit wonten jawah, ananging dereng kathah. Mangsa Rendheng, dhawah antawisipun wulan Kapitu (Dhesember-Januwari), Kawolu (Januwari-Pebruwari), saha Kasanga (Pebruwari-Maret). Pratandhanipun sampun kathah jawah.
Adhedhasar saking perangan-peranganing mangsa ing nginggil punika, kahanan ngalam samangke ngancik wonten ing Mangsa Labuh, inggih punika Kapat, Kalima saha Kanem. Ing mangsa Kapat, wiwit wonten jawah, ananging dereng kathah, sawenehing wit-witan sami semi malih, randhu sami garing lajeng mecah, palawija sampun sepuh, saha glathik sami neba ing tegil. Ing mangsa Kalima, kathah laron sami medal saking gumukipun lajeng dipun tedha dening peksi terik. Lempuyang saha kunci sami medal bungipun. Ing mangsa Kanem jawahipun sansaya deres, mangsanipun nyebar saha ngurit. Peksi blekok sami dhateng sabin.
Mangsa Kapat dipuncandra kadosdene waspa kumembeng jroning kalbu. Liripun, waspa utawi eluh kaupamekaken toya, wondene kalbu utawi manah kaupamekaken sumber, ateges mangsanipun sumber pepet. Panyandranipun mangsa Kalima kadosdene pancuran emas sumawur ing jagad. Liripun, pancuran dipunupamekaken jawah, wondene sumawur punika dhawahipun jawah. Panyandranipun mangsa Kanem kadosdene rasa mulya kasucian, liripun mangsanipun wowohan sami nedheng-nedhengipun uwoh. Mangsa Labuh, tumrapipun para among tani, sanget dipuntengga-tengga jalaran dados paugeran kangge miwiti makarya ndhedher pantun dhateng sabin.
Pramila saking punika, tiyang tani kedah saged nggatosaken tumapakipun satunggal-satunggaling mangsa, jalaran wonten ing salebeting taun punika boten sami. Samubarang ingkang dipun tanem ugi benten-benten, kacundhukaken kalihan mangsanipun. Manawi anggenipun nanem tetuwuhan anyulayani kalihan mangsanipun, amesthi boten saged sae asilipun. Tuladhanipun tiyang nanem sata wonten ing mangsa rendheng, amesthi boten saged kasil kados ingkang dipunkajengaken, jalaran sata boten cocog manawi kekathahen toya.
Makaten ugi tumraping tetuwuhan sanesipun, kedah saged nggatosaken golonganing taneman ingkang kedah dipun tanem wonten ing mangsa Labuh, Rendheng, Mareng, utawi Katiga. Ananging samangke, mangsa-mangsa punika sampun boten cundhuk kalihan alam sapunika, kadhangkala sataun saged dangu mangsa katiganipun, lan ugi saged kadadeyan kosokwangsulipun inggih punika dangu mangsa rendhengipun.